هم فوق هم ولكن من هم؟

هم فوق هم ولكن من هم؟

بقلم الصحفي أحمد عثمان

الماغوط يترغل قائلاً
لقد أعطونا الساعات وأخذوا الزمن .. أعطونا الأحذية وأخذوا الطرقات .. أعطونا البرلمانات وأخذوا الحرية .. أعطونا العطر والخواتم وأخذوا الحب ..
أعطونا الأراجيح وأخذوا الأعياد .. أعطونا الحليب المجفف وأخذوا الطفولة .. أعطونا السماد الكيماوي وأخذوا الربيع .. أعطونا الجوامع والكنائس وأخذوا الإيمان .. أعطونا الحراس والأقفال ، وأخذوا الأمان ..

نسي الماغوط أن يقول أعطونا الكهرباء وأخذوا النور وأعطونا الأمل وأخذوا المستقبل وأعطونا الأحلام وأخذوا النوم

الوزير_الشعار يلهبنا ويدغدغ عواطفنا بمنشور أقل ما يقال فيه أنه ضحك عاللحى وأنه خطاب بعثي مسبوك بشكل جيد سمعناه كثيرا من حكومات الساقط بشار الأسد
أنه لتستمر الخدمة في قطاع الطاقة يجب زيادة الأسعار ولكن الشعار أضاف أنه يجب أن نوازن بين الرحمة والمسؤولية وأن بشار الأسد كان يقدم الكهرباء بأسعار مصطنعة كأداة سياسية لا بدافع الرحمة ويجب تصحيح المصطنعة وطبعا لم يخلوا منشوره من تمنيننا بزيادة ساعات التغذية وأنه لا بد من الصدق والمصارحة

شو رأيك نحكي بنفس الشفافية والصدق والمصارحة في وقت مضى قلت انك كنت تخشى الإعتقال من الدولة التي كنت وزيراً فيها مع كل عودة إلى الوطن
والآن يا سعادة الوزير ألا تخشى الإعتقال من هذا الشعب الذي لم يبقى أمامه إلا أن يسكتكم.
لحتى نحكي بصراحة أكثر
يا سيادة الوزير شو رأيك تطالب الحكومة ومن باب العدل إنها تعطيك ١٠٠ دولار راتب بالشهر وتسلم سيارتك الحكومية وتنزل عالشارع تركض وراء المكاري وبعدين تفضل نظّر علينا ووقتها رح نسمع ونقلك آمين

المواطن كل الكلام يلي اتفضلت في حضرتك ما بهمه وإنه بشار الأسد وحكومته كانت عم تدعم مو رحمة بالشعب تفضل يا وزير المسؤولية ورجينا الرحمة والشفقة اللي صارت مطلب لسبعين بالمية من شعب سوريا.
يلي بخليك تدخن ويمكن تخلط مي وزيت كلام السيد عبد الحميد السلات مدير دائرة الإعلام الحكومي في وزارة الطاقة كرر نفس حكي الوزير وكأنه متفقين عالحكي وقال
يا منرفع يا منوقف
كأنه هالكلام سمعناه كثير بتتذكروا ولا ذكركن كانت الحكومة تجتمع الأربعاء بالليل ونفيق الخميس نلاقي الخازوق بصباحيتنا كل مرة رفع شغلة بس ومع هالشي ما كان الرفع هيك
الملفت بكلام الشيخ عبدالحميد وقت قال إن لجان واجتماعات قررت أن المواطن لو استعمل كل أدوات بيته ما بيستهلك أكثر من ١٥٠ كيلو وات وهنن كرم أخلاق رح يعطوا ٣٠٠ كيلو بالسعر المخفض
يمكن هاللجان واحد فران والثاني باطنجي والثالث كاين يبيع مي عالتريزينا
لك في بيت بيستهلك أقل من ٦٠٠ كيلو وهاد إنارة وبس
ويتابع القول إن مؤسسات الدولة تستهلك ٣٠ بالمية بما فيها مؤسسات القصر وسوف تدفع مثلها مثل أي مواطن
عم تضحك علينا
شو رح تدفع من جيبة اللي خلفوها ما بالنتيجة هالمواطن ابن ستين كلب هوي اللي رح يدفع والفاتورة رح تتسدد من موازنة الدولة
في اقتراح قسم قيمة الفاتورة عالموظفين بكل مؤسسة لنمشي معك بكل شي قلته

وقت القاضي بيصدر الحكم بيطلب المحكوم من القاضي الشفقة والرحمة فالقاضي إذا؛ ابن حلال بنزله الحكم
عطوفة حكومتنا شوية شفقة ورحمة لهالعباد من كثر البخاويش اللي صارت بالكلسون انكشفت العورة وبين المستور
ولسا عم تقولوا رقع
انتوا نسيتوا انه رفع الكهرباء رح ترفع كل الأسعار بالبلد المهنية والتموينية والزراعية ورح تخلي المواطن يرفع مدري شو
بلدنا وشعبنا تأهرم كثير وحاجته وما تزيدوا عليه هم فوق همه
حاليا هو ما عم يستنى منكن الا الخير.

فيا صباح الخير